QDF “Qarabağın Rəngləri” adlı layihəni təqdim edir

Qarabağ Dirçəliş Fondu (QDF) ölkə ictimaiyyətinin işğaldan azad edilmiş ərazilərin bərpası kimi mühüm bir missiya ətrafında birləşərək bərpa və quruculuq işlərinə töhfə verə bilməsi və ən əsası bu torpağın gözəlliyinin və Azərbaycan xalqının mədəni irsinin təbliğ olunması məqsədilə “Qarabağın Rəngləri” adlı yeni layihəsini təqdim edir.

Layihə çərçivəsində Azərbaycan Dövlət Rəssamlıq Akademiyasının tələbəsi olan 23 nəfər istedadlı gənc rəssam və heykəltaraş tərəfindən Qarabağın ruhunu özündə birləşdirən sənət əsərləri - 19 rəsm və 4 heykəl yaradılıb.

Həmin gənc rəssam və heykəltaraşlar 200-dən artıq Akademiya tələbələri arasında keçirilən açıq müsabiqə vasitəsi ilə Azərbaycan Rəssamlar İttifaqının sədri, Xalq rəssamı Fərhad Xəlilov, Azərbaycan Dövlət Rəssamlıq Akademiyasının rektoru, Xalq rəssamı Natiq Əliyev və Akademiyanın prorektoru, Xalq rəssamı Səlhab Məmmədov kimi təsviri incəsənətimizin məşhur simalarından ibarət olan münsiflər heyəti tərəfindən seçilib.

Yaradıcılıqla bağlı tələb olunan bütün xərclər (o cümlədən kətanlar, rənglər, materiallar, çərçivələr və s.) və tələbələr üçün xüsusi təqaüdlər Qarabağ Dirçəliş Fondunun dəstəyi ilə qarşılanıb.

Qeyd edək ki, Qarabağa olan hədsiz sevgidən ilhamlanaraq hazırlanan və Qarabağın sarsılmaz ruhunun ifadəsi olan sənət əsərlərinin bir hissəsi artıq satışa çıxarılıb. Qalan hissəsinin isə yaxın gələcəkdə xüsusi qala gecəsi çərçivəsində təşkil olunacaq xeyriyyə hərracı vasitəsilə satışa çıxarılması nəzərdə tutulub. Daha sonra işlər Bakının ən məşhur qalereyalarından birində xüsusi təşkil ediləcək sərgidə geniş ictimaiyyət üçün nümayiş olunacaq.

Əsərlərin satışından toplanan bütün vəsait Ağdam rayonunun ərazisində yerləşən və hazırda Qarabağ Dirçəliş Fondunun maliyyə dəstəyi ilə bərpa olunan Pənahəli xanın İmarət kompleksinin bərpasına yönəldiləcək.

Qeyd edək ki, əsərləri əldə etmək üçün birbaşa Qarabağ Dirçəliş Fonduna ianə etmək kifayətdir.

Layihə və işlər haqqında ətraflı məlumatla layihənin rəsmi internet-səhifəsi, xüsusi kataloqu və qiymət cədvəlindən tanış olmaq mümkündür.

Rəsmi internet-səhifə

Kataloqa keçid

Qiymət cədvəli

Fonda ianə etmək imkanları barədə Qarabağ Dirçəliş Fondunun rəsmi səhifəsində tanış olmaq mümkündür.

Qeyd olunmalıdır ki, aprelin 5-də Azərbaycan Dövlət Rəssamlıq Akademiyasının (ADRA) Elmi Şurasının iclasında layihənin, eyni zamanda layihə çərçivəsində hazırlanan kataloqun və https://colorsofkarabakh.com saytının təqdimat mərasimi keçirilib.

Mərasimdə QDF-in İdarə Heyətinin sədri Rəhman Hacıyev, ADRA-nın rektoru, Xalq rəssamı Natiq Əliyev, ADRA-nın Beynəlxalq əlaqələr üzrə prorektoru, Xalq rəssamı Səlhab Məmmədov, ADRA-nın Elm və yaradıcılıq işləri üzrə prorektoru, Xalq rəssamı Fuad Salayev, ADRA-nın Ümumi işlər üzrə prorektoru Hacı Mail-zadə, ADRA-nın professoru, Əməkdar incəsənət xadimi Çingiz Fərzəlibəyov, Akademiyanın professor-müəllim heyəti, eləcə də Fondun əməkdaşları iştirak ediblər. Layihə və təqdim olunan əsərlər iştirakçılar tərəfindən böyük maraqla qarşılanıb.