Şagirdlər əl işlərinin satışından əldə etdikləri vəsaiti Qarabağ Dirçəliş Fonduna ianə etdilər

19 dekabr 2024-cü il tarixində İlyas Əfəndiyev adına Elitar Gimnaziyada “Qarabağı birlikdə daha gözəl bərpa edək” adlı tədbir keçirilib.

Dövlət himninin səsləndirilməsi ilə başlayan tədbirin əvvəlində ölkəmizin ərazi bütövlüyü və suverenliyi uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə açan İlyas Əfəndiyev adına Elitar Gimnaziyanın direktoru Səadət Cahandarova bildirib ki, sərginin keçirilməsində məqsəd Gimnaziyada təhsil alan şagirdlərə öz istedadlarını nümayiş etdirmək imkanı yaratmaqla yanaşı, onlarda vətənpərvərlik ruhunun yüksəldilməsidir.

Tədbir iştirakçıları şagirdlərin əl işlərindən ibarət sərginin təşkilini yüksək qiymətləndirməklə yanaşı, bu cür sərgilərin şagirdlərin Qarabağla bağlı məlumatlarının artırılması baxımından əhəmiyyətini vurğulayıblar.

Çıxışlardan sonra tədbir iştirakçıları sərgi ilə tanış olublar.

Qeyd edək ki, sərgidə nümayiş olunan əl işlərinin satışından əldə olunan vəsait işğaldan azad edilmiş ərazilərin bərpası istiqamətində görülən işlərə dəstək vermək məqsədilə Qarabağ Dirçəliş Fonduna ianə edilib.

Fondun  İdarə Heyəti  sədrinin müşaviri Rəşad Qasımzadə tədbirin ölkəmizdə ianə mədəniyyətinin təşviq olunması baxımından da əhəmiyyətini qeyd edib və “İanə Sertifikatı”nı İlyas Əfəndiyev adına Elitar Gimnaziyanın direktoru Səadət Cahandarovaya təqdim edib.

Sonda tədbir iştirakçıları xatirə şəkli çəkdiriblər.

Məlumat üçün bildirək ki, tədbirdə Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktor müavini, Agentliyin Bakı Şəhəri üzrə Təhsil İdarəsinin müdiri vəzifəsini müvəqqəti icra edən Nərminə Hüseynova, Azərbaycan Respublikasının Təhsil İnstitutunun direktor müavini Fuad Qarayev, Qarabağ Dirçəliş Fondunun İdarə Heyəti  sədrinin müşaviri Rəşad Qasımzadə, Ailə, Qadın və Uşaq Problemləri üzrə Dövlət Komitəsi yanında İctimai Şuranın sədri Fariz Əkbərov, Milli Qəhrəman Polad Həşimovun həyat yoldaşı Ofeliya Salmanova, “Qubadlı fatehi” ləqəbli Vətən müharibəsi şəhidi Vidadi Xəlilovun həyat yoldaşı Nərmin Xəlilova, Vətən müharibəsi veteranı Təbriz Qorçizadə, gimnaziyanın qəbaqcıl müəllimləri və şagirdləri iştirak ediblər.