Qarabağ Dirçəliş Fondunda BMT-nin Ətraf Mühit Proqramının (UNEP) nümayəndə heyəti ilə görüş keçirilib
07 iyul, 2022
Qarabağ Dirçəliş Fondunda BMT-nin Ətraf Mühit Proqramının (UNEP) nümayəndə heyəti ilə görüş keçirilib

Qarabağ Dirçəliş Fondunun İdarə Heyətinin sədri Rəhman Hacıyev ölkəmizdə səfərdə olan BMT-nin Ətraf Mühit Proqramının (UNEP) nümayəndə heyəti ilə görüşüb.

Görüşdə Qarabağ Dirçəliş Fondunun İdarə Heyətinin sədri Rəhman Hacıyev, BMT-nin Ətraf Mühit Proqramının (UNEP) eksperti Hassan Partou, BMT-nin Ətraf Mühit Proqramının (UNEP) Avropa ofisinin regional koordinatoru Mahir Əliyev, Tikinti tullantılarının idarəedilməsi üzrə mütəxəssis Anvar Abdullah Saadun, Ekologiya və Təbii Sərvətlər Nazirliyinin Ekoloji siyasət şöbəsinin müdiri Faiq Mütəllimov  iştirak ediblər.

Qonaqları salamlayan Rəhman Hacıyev Qarabağ Dirçəliş Fondunun yaradılması, əsas məqsəd və vəzifələri, missiyası, prioritetləri, həyata keçirilən və cari layihələri barədə ətraflı məlumat verib. Rəhman Hacıyev Ali Baş Komandan İlham Əlivevin rəhbərliyi ilə müzəffər Azərbaycan ordusunun qazandığı tarixi qələbədən sonra qarşıda dayanan əsas vəzifələr, yaranan yeni reallıqlardan bəhs edib.

Fondun əsas prioritet istiqamətlərindən birinin ekoloji tarazlığın bərpası olduğunu qeyd edən Rəhman Hacıyev, Ekologiya və Təbii Sərvətlər Nazirliyi ilə birgə imzalanmış “Anlaşma Memorandumu” çərçivəsində reallaşdırılan “Zəfərdən dirçəlişə” adlı Zəngilanda meşə massivinin salınması layihəsi barədə ətraflı məlumat verib.

İdarə Heyətinin sədri Rəhman Hacıyev işğaldan azad edilən ərazilərdə təbiətin dirçəlişinə və yenidən oyanışına töhfə vermək məqsədilə “ağac ianə et” kampaniyası çərçivəsində cəmiyyətin hər bir üzvünün bu prosesdə fəal iştirak etməsi üçün keçirilən təşviqat xarakterli tədbirlərin Qarabağın dirçəlişi prosesində  mühüm rol oynadığını bildirib.

Sədr öz çıxışı zamanı Fondun maliyyə dəstəyi ilə Füzuli şəhəridə yaradılması nəzərə tutulan “Füzuli Mərkəzi Parkı” layihəsi barədə ətraflı məlumat verib.

BMT-nin Ətraf Mühit Proqramının (UNEP) eksperti Hassan Partou ilk olaraq görüşmək fürsəti yaradılmasına və verilən ətraflı məlumata görə təşəkkürünü bildirib.

Hassan Partou görüş zamanı işğaldan azad edilən ərazilərdə hazırda mövcud olan dağıntıların təkrar emal edilməsi məsələsinə xüsusi yer ayırıb. O, dağıntılardan tikinti prosesində yenidən istifadə edilməsi ilə bağlı təkliflər irəli sürüb. Hassan Partou bildirib ki, dağıntıların təkrar emal edilməsi ilə mümkün xərclərin azaldılmasına, eyni zamanda ətraf mühitin ekoloji stabilliyinin qorunmasına nail olmaq mümkün olacaqdır.  

Görüş zamanı BMT-nin Ətraf Mühit Proqramının nümayəndələri tərəfindən qeyd olunan mövzular ətrafında fikir mübadiləsi aparılıb və həyata keçirilən bu və digər ekoloji layihələr çərçivəsində potensial əməkdaşlıq perspektivləri müzakirə olunub.

Sonda Rəhman Hacıyev Qarabağda infrastrukturun və ətraf mühitin bərpası sahəsində göstərdikləri marağa, bu sahədə öz təcrübələrini bölüşdüklərinə və səsləndirilən fikirlərə görə nümayəndə heyətinə təşəkkürünü bildirib.

Xəbəri paylaş
Azərbaycan Respublikasının Prezidenti Azərbaycan Respublikasının I Vitse-Prezidenti Heydər Əliyev Mərkəzi